By: Denise N. Fyffe.
Copyright © 2013, Poetess Defy, Denise N. Fyffe

I fine it funnie yuh see
Fi foriengner a seh
Usain Bolt a run inna
Video game times
Ah bwoy;

Dem neva knuh we capable so
Dem neva knuh seh a so we did a run fass from backra massa
Climb di Cockpit Country hills
Inna Trelawny and feed pon cassava;

Jamaica a 50
Caan believe we deh roun so long
But as a sprinting nation
We dominance strong strong;

Dem neva knuh,
We can run fassa
Asafa powell did done set di bar sar,
When everybaddy did fi get bout har,
Shelly Ann Fraser Pryce seh
me a pocket rocket
An nuh baddy else nah get di gold
A fi mi name deh pon it;

Yohan a cum dominate di ting
Him morph to size an tun inna a sprinting beast
Winning 100 and 200 wid ease
Even doh Usain a beat him chest
Inside a him head,
Yuh knuh him a fret;

Jamaica a 50
Caan believe we deh roun so long
But as a sprinting nation
We dominance strong strong;

Boy, me proud a ole a we Jamaican sprinting picknie
Dem mek me jump up and dung
An gwaan like me fool fool or crazy;

Jamaica a 50
Caan believe we deh roun so long
But as a sprinting nation
We dominance strong strong;

Jamaicans a run from we bawn
From we deh a primary and high school
Jamaicans a run from we bawn
We did just a gwaan cool;
Now dat we a dominate di ting
We show di worl seh
Yuh nuh need drugs fi win;

Jamaica a 50,
Caan believe we deh roun so long
But as a sprinting nation
We dominance strong strong;
As a sprinting nation,
We indomitable man.
Ayi yi.